風水命理開運專家

		報章名稱：新Monday 刊登日期：2002年10月18日文章主題：區仲德睇眾星判前生

　　正所謂欲知前生因，今生受者是；欲知來世果，今生作者是。喺佛家角度，前世、令生、來世係一個因果循環，無論你今時今日嘅富貴貧窮或者面相外貌，其實都與前世有所關連，今次我哋就搵嚟玄學家區仲德師傅根據藝人特微推算前世令生。

胸口有痣
代表人物：楊千嬅
前世係乜：幸福小女人
師傅判你：
　　「胸懷大『痣』唔一定充滿理想，反而可以知道胸懷大『痣』嘅女人一定前世今生都好有福澤，因為全因上一世積滿福澤，今生先會有痣喺身，而且，福澤重會帶到今生兼自己下一代，會生個貴子兼叻仔。」
其他相似人物：BoBo, Mango

胸細平坦
代表人物：鄭秀文
前世係乜：男人兼病壞
師傅判你：
　　「女人胸細你哋就話人洗衫板，其實人哋都唔想架！女人胸細，前生一定會係男人，而且重要係周身病痛，身無半兩肉。相反，今生胸大凸圍者，前世相信係一頭豬嘅機會較高，原因我諗唔使講都明啦！」
其他相似人物：孫燕姿、袁詠儀

濃眉大眼
代表人物：張栢芝
前世係乜：老虎乸
師傅判你：
　　「濃眉大眼嘅人通常俾人感覺係精靈活潑，周身散發住陽光氣息，而且個性很強，性格比較倔強。不過，原來一個人生得濃眉大眼，呢個人前世好有機會係一隻動物，例如老虎，點解前世係老虎，今世就會眼大眉濃？原因係前世死後，再投胎轉世時，身體上嘅特徵只會隨投胎時減退，但不會消失，故此，生得濃眉大眼者前世多屬老虎。」
其他相似人物：趙薇、林心如

嘴大唇厚
代表人物：舒淇
前世係乜：鹹濕佬
師傅判你：
　　「人哋話嘴大唇厚好似舒淇咁，一般都喜歡照顧身邊嘅親朋戚友，而且能言善辯。但嘴大唇厚嘅人，前一世極可能係生性風流，兼且若果今世係女人，上一世就一定係男人，因為投胎轉世一定係一世男一世女，除非作孽太深，打入畜道，才會轉世為畜。」
其他相似人物：鍾麗緹、EO2 (Otto)

手腳多毛
代表人物：陳慧琳
前世係乜：猩猩
師傅判你：
　　「有人話手毛長性慾強，呢個冇人可以百分百肯定，但當人見到別人手毛長時，就會話人係猩猩，雖然有啲侮辱，但又唔係百分百錯喎！因為上一世係猩猩，下一世一定要比較瘦兼多手毛腳毛，但若果呢一世又肥又多手毛，咁就未必係猩猩，可能係較大型嘅動物，如獅子、熊等。另外有人心天生有痣，又Kelly一樣，相信前世一定多運動，引致身上留有傷痕，或者前世死時受到極大創傷，以致今世仍保留疤痕。」
其他相似人物：李克勤

十指纖幼
代表人物：梁詠琪
前世係乜：窮書生
師傅判你：
　　「而家見人十指纖幼，大家都會估到佢工作一定唔操勞，返工唔使用力。但原來相學嘅睇法都有接近道理，對照番前世因果，今世十指纖幼嘅人，上一世一定係讀書人居多，唔使擔泥托木。相反前世要耕田種米，或者要武刀弄劍，今世出世時，手指就會特別肥大同圓，所以想知呢個人係咪勞碌命，娣手指都可以。」
其他相似人物：Yu、小雪

頸項有痣
代表人物：朱茵
前世係乜：法官
師傅判你：
　　「頸上有痣嘅人，個性大多容易率性而為，由於自我意識極為強烈，所以較難接受別人嘅勸告。比較少會主動替人設想，而且前世可能係一個事事以人為先、講求公平、重視法紀嘅人，分分鐘係法官都未定。」
其他相似人物：黎瑞恩