風水命理開運專家

		報章名稱：新報刊登日期：2004年12月31日文章主題：05預測娛樂圈帶木會紅

事業預測
容祖兒：紅到發紫力壓千嬅
　　講完男歌手，咁一定要講下女歌手啦！今年英皇一姐容祖兒由頭帶到尾，出年仍然佢一支獨秀，勢不可擋！區仲德話：「祖兒本身屬金，睇佢嘅八字，起碼重可以紅多四年！」

　　至於樂壇天后王菲又點呢？區師傅狠批佢運勢已經到頂，難再有高峰：「王菲命格屬陰木，出年行水運。正所謂水多木飄，所以出年財運，呢幾年運勢都較一般，至到08年都麻麻地。」

　　而沉醉愛河嘅天后楊千嬅命格都係屬陰木，不過佢就係冬天嘅木，比阿菲好少少。財運方面出年唔錯，到41歲都會財源滾滾。加上出年交名譽運，有機會攞獎。不過區師傅補充一句：「睇嚟出年個勢，都會係祖兒騎住千嬅！」

梁洛施：聽教聽話多貴人
　　Isabella梁洛施由十七歲開始行大運，嚟緊呢五年都有貴人扶助，加上命中多桃花星同紅艷星，易有觀眾緣。區仲德話：「今年係甲辛年，行木，梁洛施又行正官星運，正所謂官印相生，功名有望，一定大紅。」區師傅重話Isabella多貴人相助，加上佢聽教聽話，忍得捱得，同Twins一樣咁乖，所以一定得到公司重用，想唔紅都幾難！

薛凱琪：駁嘴出事
　　今年女新人一直都係梁洛施同薛凱琪之爭，出年梁洛施遙遙領先，不過薛凱琪個勢都晤弱。

　　區仲德現率先為大家預測來年呢幾位新紮小天后走勢如何：

　　薛凱琪：命格屬陽火，命格中有幾粒紅艷星，有貴人相助，出年重會繼續紅，不過就會名大於財。加上明年係雞年，易有口舌之爭，如果薛凱琪經常「把口唔收」，咁對佢事業一定有影響。

　　鄭融：命格屬丁火，貴人力強，04年行官財財運，因而成功跑出，愛情事業都唔錯。出年財運好過名譽運，人氣可能會較遜色少少。

　　宮恩娜：同鄭融一樣，都係屬丁火，今年係甲辛年，同命格配合，行正貴人運同財星運。出年發展一般，到06年事事要小心，感情事業各方面都會有大變動，前境唔係太明朗。

城城仆值
　　至於近幾年事業直插谷底嘅郭富城，出年個勢又會點呢？
　　區仲德話：「郭富城命格屬癸水，一定要行金水運先得，92、93年就係行正金水運，所以嗰陣佢當時得令。至於今年同出年因為金木相剋，所以佢嘅大運麻麻，運勢比較反覆，07年或者會好少少。」

新四大天王：基仔熱爆　梁漢文當黑
　　04年男歌手當旺，特別係自從阿倫「策封」新四大天王之後，競爭更加激烈。今年似乎以安仔同克勤形勢最好，咁出年又如何？

　　區仲德師傅以四人八字推算，得出結果如下：

　　李克勤：克勤命格屬木，呢幾年當旺，加上有名譽星同貴人星照住，運勢愈來愈好，重會紅到41歲！不過出年就會名大於利，但人氣更勁！

　　許志安：安仔今年命格犯太歲，所以運勢較反覆，出年財運會好少少，加上智慧星發揮，會有機會攞獎，重有四年運行，一直紅到42歲。不過要留心出年可能有少少意外，特別喺乘搭交通工具時要小心。

　　梁漢文：屬木嘅Edmon有少少運滯，皆因出年佢嘅運勢比較反覆，未來五年大運行正「日元入墓」，阻滯較多，06年更加辛苦，事業方面會有衝擊。區師傳話Edmond命格中唔夠水，如果想化劫嘅話，應該去多啲東北面或北面，同埋著多啲黑、藍同灰色衫，運勢會有改善。

　　古巨基：新四大天王中，以基仔出年運勢最勁，屬金嘅佢呢幾年行大運，一真紅到08年，出年重行正偏財運，事業運重好過今年多多聲。區師傅仲話：「基仔出年嘅發展一定好過克勤，重係四個裡面最好！」