風水命理開運專家

>> 世盃大迷信狠批黑仔王 >> 世盃大迷信狠批黑仔王

		報章名稱：新Monday 刊登日期：2006年05月12日文章主題：世盃大迷信狠批黑仔王

　　今屆世界盃，認真大鑊！有冇咁大鑊？熱門國家主力球星傷完一個又一個，德國迪斯拿傷膝收皮、意大利托迪斷腳啱啱復出、阿根廷艾馬腦炎.....好番都唔知有冇壞腦！但係最大鑊！一定係英格蘭，奧雲叫做好番啲，而家朗尼又被葡人「費拉」拿剷斷咗隻腳，費sir唔俾朗尼去德國，艾歷臣話要有奇蹟，朗尼呢位英格蘭希望，睇嚟都要希望4年後再嚟過。

　　大膽講句，黑仔王應該唔止朗尼1個，所以《新Monday》從32強8組裏面嘅熱鬥球隊嚴選1位重點球星俾玄學家區仲德師傅，批下世界盃期間會發生咩黑仔事。

　　結果，雲佬可能會因頂頭槌而爆缸，而星仔可能會因球證誤判而被趕出場等等，oh，My god!

亨利衰惹火受傷
　　亨利屬蛇，命格屬陽火，農曆七月生，重火土，犯煞敗格，即係話亨利踢波表現雖然出色，但性格可能串咗啲，曾引嚟敵衛發火踢傷佢。

碧咸衰是非纏身
　　碧咸屬兔，命格屬陰土，農曆三月生，重土木金，犯桃花煞，即係話碧咸會遇上反覆無常嘅小人（尤其女人），惹是非，唔通碧咸老婆會同艾歷臣鬧交？

列基美衰冇方向
　　列基美屬馬，命格屬陰火，農曆五月生，火土成勢，犯白虎煞，即係話佢喺世界盃期間會變得有勇無謀，失去方向，阿根廷靠佢指揮喎，咁咪大鑊！

舒夫衰唔識收火
　　舒夫真高屬龍，命格屬陽木，農曆七月生，木火通明，犯地煞星，即係話世界盃期間雖然踢得好，但係唔識收，會受傷。

波歷克衰災難煞
　　波歷克屬龍，命格屬陰金，農曆八月生，重火土，犯災難煞，即係話佢容易受傷，英格蘭傷朗尼唔掂，德國傷波歷克重唔掂喎！

C．朗衰獨食出局
　　C．朗拿度屬牛，命格屬陰木，農曆正月生，重水木，犯病荷煞，即係話佢成日扭啲以為自己好勁嘅扭波，結果就會太過圖令球隊直接出局。

細哨衰爭做大佬
　　朗拿甸奴屬猴，命格屬陰水，農曆二月生，金水木重，犯天狗星，即係話小人當道，會惹是非，唔通佢呢一排風頭太勁，會同朗拿度鬧交爭做大佬？

雲佬衰冇頭槌波
　　雲佬斯達萊屬龍，命格屬陽木，農曆五月生，重木火土，犯披頭煞，即係話會有頭部受傷嘅情況出現，少頂波為妙，不過唔怕，雲佬最叻禁區執雞！

托迪衰燥底打交
　　托迪屬龍，命格屬陰金，農曆八月生，重金火，犯天握煞，即係話燥底嘅托迪好可能會同人鬧交，發生碰撞重會打交添！哈，佢喺02年有紅牌，06年又紅出場！

壽仔衰孤煞失寵
　　中田英壽屬馬，命格屬陰火，農曆五月生，重火土，犯孤虛煞，即係話中田仔得唔到教練重用，出場時間少，坐冷板，佢今屆喺保頓都冇乜正選踢！

星仔衰禍從天降
　　朴智星屬雞，命格屬陽木，農曆正月生，重金木，犯暗刑煞，即係話會出現禍從天降嘅意外，例如：明用用腳控球，球證竟然吹佢手球，然後紅牌出場。

朗尼衰波折重重
　　朗尼屬牛，命格屬陽火，農曆九月生，重火土，犯三刑煞，即係話世界盃期間會波折重重，不過而家去世界盃之前都好波折重重啦！